2014-imi Ataatsimeersuarneq Siulittaasup oqalugiaataa

 

 

Asasakka ilaasortat, asasakka qaaqqusat.

 

 

Unnuk manna Peqqissaasut Kattuffiata 23-issaannik ileqquusumik ataatsimeersuarneranut atatillugu tikilluaqqusisinnaanera nuannaarutigaara.

 

Ukiumi qaangiuttumi siulersusuusimasut tassaapput: Inuuti Fleischer, siulittaasoq, Ken Jensen siulittaasup tullia, siulersuisunilu ilaasortat: Britt Hjort Christensen, Pauline Olesen, Dorthe Møller, Olga P. Berthelsen Hannah Højgaard Pedersen-ilu.

Kingullermik ataatsimeersuarnermiit ukiumi qaangiuttumi pisut ima nassuiassavakka:

Qaammatini 15-ini kisimeereerlunga apriilip aallaqqaataaniit 2014 Anette Melchior Jensen, peqqinnissaqarfimmi suliffimmi avatangiisinut siunnersortaasimasoq allatsinngorpoq.

Taamaasilluta ukiuni arlertuni Kalaallit Nunaanni peqqinnissaqarfimmik ilisimannittumik atorfinititsivugut, tamannalu nuannaarutigeqaarput.

Siulersuisut ukiumi qaangiuttumi iliuusissatut siunniussaq, siuliani isumasioqatigiinnerup ataatsimeersuarnerullu kinguninngua suliarineqartoq, kattuffiup nammineq ilumini avammullu ersersinnissaa qitiutillugu sulipput.

PPK/PK Peqqissutsimut Attaveqarnermullu Naalakkersuisumik naapitsipput Ilaqutariinnermut Peqqissutsimullu ataatsimiititaliaq ataatsimeeqatigineqarlunissaaq. Politikerit peqqissutsimut politikkiliornerminni kattuffittut ilisimasaqarfittut atorneqarsinnaanerput oqariartuutaavoq. Oqariartuutip tigulluarneqarnera misigaarput, sulili iliuusissatut pilersaarutinik tigussaasunik kinguneqartinneqanngilaq.

PK-ip, siulersuisut sulisullu sinniisaasa maajip ulluisa arfineq aappaanni arfineq pingajuannilu isumasioqatigiitsiarneranni, Peqqissutsimut Attaveqarnermullu Naalakkersuisoq qaaqquneqarpoq. Politikkikkut akisussaasut pingaarnersaannik naapitaqarneq, apeqquteqarfigineqarsinnaaneq apeqquteqarsinnaanerlu iluarisimaarnaqaat. Taama periarfissiineq ingerlaannarilitoq!

Ukioq suliffinni ulapaarfiusimaqaaq tamatumalu kingunerisaanik ilaasortatta ilungersortitaanerat nalunaarutigineqartarpoq. Politikkikkut anguniakkat eqquutsinniagassaapput pisariillisaanerillu ingerlanneqarlutik. Sulisoqarneq allannguiffigineqanngilaq, inuit taakku nukingernerulersiinnarneqarput, ulapaarnerulersinneqarput tamannalu naleqqutinngilaq! Uanga isumaqarluinnarpunga, qullersat sulisunik attaveqateqarnerat ilaatigut pitsaanerpaaffissaminiittanngitsoq. Ilaasortat amerlasuut oqaloqatigisartakkakka aaqqissuussaanikkut inissisimaffinni assigiinngitsuni naatsorsuutigisinnaasat naleqqussarneqannginnerat pissutigerpiarlugu, annertuumik ilungersortitaasutut misigisimapput. Peqqinnissaqarfimmi kommuninilu ilaasortatsinnut allanillu ilinniagalinnut anguniagassatut siunniussaq takujuminaassimavoq. Arlallit ilungersuuteqalerlutik/stress sulisinnaajunnarsimapput sivisuumillu sulinngiffeqartariaqarlutik, tamanna aaqqissuussaanikkut inissisimaffinni tamani atuuppoq. Ilaasortat ilungersuuteqalerlutik/stress napparsimalersut tamatuma sulisilluni ajoqusernertut nalunaarutiginissaanut kajumissaarpakka. Taama nalunaarutigineqarnerisigut kattuffittut minnerunngitsumillu sulisiutsisutut isummerfigisinnaanissaa, neriuutigisatsitullu oqaloqatigiissutigalugu ajornartorsiummut patsisaasup aaqqiviginissaa, taamaasillutalu ilaasortat sulinermi ilungersuuteqalersarnermik/stress eqqugaannginnissaasa sapinngisarput tamaat anguniarnissaa ajornannginnerulissaaq. Taamaanngippat sulisut/ilaasortat suliffimminni atugaat misissuiffigisariaqalissavagut.

Anguniagassatut siunniussaq anguneqassappat sulisut qanimut oqaloqatigalugit suleqatigalugillu suliassanik tulleriiaarinissaq annertuumik piumasaqaataavoq! Taamaaliorneq kajumilersitsillunilu tunniusimanerulersitsisarpoq.

PK ukiup matuma ingerlanerani suliffimmi qanoq ingerlaneq pillugu nutaamik misissuisitsiniarpoq, aqutsineq pillugu apeqquteqartoqartassalluni suliffiullu sulisunit iluarineqarnera pillugu misissuisitsisoqarnissaa kissaataanersoq apeqqutigineqassalluni. PK-ip suliffimmi avatangiisit tarnimut sunniutaat pingaartitareqaat, PK-llu suliffinni avatangiisit tarnimut pitsaasumik sunniuteqarnissaannut peqataanissaq pikkorissunillu aqutsisoqarnissaq, anguniagassatut siunniussaasa ilagaat!

Killilerneqarani oqaaseqarsinnaatitaaneq naqisimaneqarpoq, nuannaarutigeqisatsinnillu sulisut suliffitsik aqutsisullu pillugit oqaaseqarsimanerat pillugu qanittukkut Ombudsmandip aalajangiinera tiguarput. Sulisut qullersaniit mianersoqqussummik tunineqarput, Ombudsmandilli aalajangiineragut mianersoqqussutit tunuartinneqarput. Taamaammat kikkut tamat oqartussaaqataanerat uagullu inatsisitigut illersugaanerput inuummersorlit. Tamanna tusagassiorfinnit annertuumik sammineqarpoq.

Siorna juullilersoq suliaq ilaasortatta 167.000 koruuninik ukiuni arlertuni annertuallaamik akissarsiaqarsimaneq pissutigalugu akiliisussanngortitaanera, aalajangiivigineqarpoq. Ilaasortatta pinngitsuutinneqarnera soorunami nuannaarutigeqaarput, suliallu qaqissimanera tulluusimaarutigalugulu nuannaarutigaarput. Suliaq ukiut marluk sinnilaarlugit ingerlasimavoq. Namminersorlutik Oqartussat aalajangiineq suliassanngorteqqinngimmassuk aalajangiineq akueralugu inerniliisimassapput.

PK-ip suliaani avaanngunartunut ilaavoq Kommuneqarfik Sermersuumi pisortat ilaata tjenestemanditut atorfeqartup tassanngaannaq- PK-llu isumaa naapertorlugu Nuummi atorfimmit allaalluinnartumut- Paamiunut nuutsinneqarniarnera pillugu kinguneqanngitsumik sorsunneq. Suliaq ajoraluartumik eqqartuussivimmut anngutinngisaannarpoq, tjenestemandip qaammammik ataatsimik piffissalerlugu Paamiunut nuukkusunnginnera pissutigalugu soraarsinneqarmat. Uanga nammineq inuttut ajuusaarutigeqaara ilaasortatta ukiorpassuarni suliffimminit taama pineqarnera uagullu allatseqarfitsinnit sapinngisarput piginnaasagullu tamaasa atorlugit tapersersorniarsimavarput. Tjenstemanditut atorfillit kommuneqarfiit iluini immaqalu nunap sinnerani sumiiffiit arlaannut nuutinniarneqarsinnaanermut annertuumik naammagittartuusariaqarnissaat tusaatissatut tigusariaqarparput. Kommuneqarfik Sermersuumit ataasiaannarluni taamaaliortoqqarnissaa neriuutiginiartigu.

Eqqortumik akissarsitinneqarnissamut tunngatillugu suli annertuunik unammilligassaqarpoq. Peqqinnissaqarfiup qullersaqarfik Aningaasaqarnermut Sulisoqarnermullu Aqutsisoqarfimmi pisortaq Lars Dencker arlaleriarlunga ataatsimeeqatigereerlugit PK-mut PPK-mullu siulittaasutut qaammatit tamaasa ilaasortat akissarsiaasa allagartaat kukkunillit aqutsisoqarfiup pisortaanut nassiuttalissagikka isumaqatigiissutigineqarpoq. Matumuuna suliassamut tamatumunnga ikiuuteqqullusi kajumissaarpassi. Akissarsiatit kukkuneqarpata ilisimatitsigut. Maanna aqutsisoqarfimmut igalaaq ammarmat periarfissarput asuliinnartissanngilarput.

PPK/PK sulianik arlalinnik ukiortaariitsiarpat eqqartuussisulersuullugu aalajangiivigisassanngorlugit suliarineqarnissaat neriuutigisanik, eqqartuussivimmut nassiussivoq. Suliat kukkusumik akissarsisinneqarnernut assigiinngitsunut tunngasuupput. Aappaagu ataatsimeersuarnermi suliap qanoq kinguneqarnerani – ajunngitsumillu inerneqarnissaanik kissarlunga paasissutissiisinnaanissara neriuutigaara J.

PK nutserpoq. Illu C.P. Holbøllsvej-imiittoq siulersuisuni eqqartorneqareerluni tunineqarpoq. Kattuffiit allat peqatigalugit ataatsimoorussatsinnik illoqalernissaq taamaaliorsikkullu ingerlatsinermut akikillisaanissaq siunertaraarput. Kattuffiit illuat tamatta katersuuffissarput pingaarutilimmik avammut oqariartuuteqassaaq. Ullutsinni ataatsimoornissaq pingaaruteqarpoq, nunatta aningaasaqarnikkut inuttullu atukkatigut ajunngitsumik ingerlanissaa akisussaaqataaffigaarput. Kalaallit Nunaat angeqaaq inukitsunnguullunili, uangalu PK-mi siulittaasutut kattuffiit allat peqatigalugit ataatsimut ingerlatsinerup iluanaarutissartai iluaqutigalugit, politikkikkut anguniakkagut piinnarnagit, ulluinnarnilu suliassatigut unammilligassat pitsanngorsaaviginissaat, anguniagassatut takorluukkama ilagaat. Ataatsimoorneq nukittunerulersitsisarpoq.

Suleqatigiinni peqataavugut ukiullu pingajuat affaq qaangiuppat illumi ataatsimuulernissarput neriunaateqarpoq.

Naggasiullugu Birgit Lynggaard peqqissaanermi ileqqorissaarnermut tunngatillugu saqqummiussaa, ileqqorissaarnermut siunnersuisooqatigiinnik PK-mi pilersitsissagutta isumassarsisitsinissaa qularutissaanngitsoq, pillugu qutsavigerusuppara. Uanga ilumoorlunga isumaga naapertorlugu peqqissaanermi innuttaasullu akornanni ileqqorissaarneq oqallisigisariaqarparput.

2015-imi ukiakkut Nunat Avannarliit peqqissaanermi ileqqorissaarnermut siunnersuisooqatigiit attaveqatigiissut naapeqatigiinnissaanni qaaqqusisuunissamut PK akuersivoq. Aaqqissuussineq annertooq pissanganartorlu Kalaallit Nunaannik PK-millu avammut ilisarititsisussaq! Tamassi aappaagu aaqqissuussinermi tamatumani takunissarsi neriuutigaara -naak ilaatiguut puuuhaartarnissarput qularnanngikkaluaq- PK-miit qaaqqusisuunissamut immitsinnut piumaffigisimanerput tulluusimaarutigeqigakku isertuutissanngilara. Aaqqissuussinerup tamatta tulluusimaarutigisinnaasatsinnik pitaasumik ingerlanneqarnissaa iluatsilluarnissaalu qularinngilara.

PK-mi siulersuisut sulisullu sinniisaat ukiumi tulliuttumi attaveqatigiinneq- pingaartumik peqqinnissaqarfiup qullersaasa qunusuilluta oqaloqatiginissaat ilanngullugu sammissavaat.

Innuttaasut, napparsimasut akornanniittusi pingaaruteqarassi tulluusimaarutigaassi, uangalu peqqissaasuunera tulluusimaarutigaara. Maniguullunga tulluusimaarlungalu siulittaasuuffigaassi.

 

Sulilluarisi.

 

Qujanarsuaq. Tusind tak.

 

Inuuti Fleischer

Siulittaasoq

Nuuk 6.november 2014