Nuuk, 19.november 2014

Siulittaasup ullorsiutaanit:

 

Kalaallit Nunaanni qinersisoqassaaq novembarip ulluisa 28-anni 2014. Siulersuisuni ataatsimiinnitsinni qineqqusaarneq oqallisigaarput, ataanilu oqaaseqaatip KNR-imut nassiunnissaa aalajangiullugu.

Ataani apeqqutit partiinut tamanut aamma nassiunneqarput.

 

Qinersinissamut atatillugu Peqqissaasut Kattuffiaanni peqqinnerup peqqinnissaqarfiullu qineqqusaarnermi oqaluuserisat akornanni amigaatigaarput.

Taamaammat- KNR-ip aamma isummerfigisinnaasai- uku apeqqutigerusuppagut:

 

  • Nappaatit suut /nakorsaariaatsit suut Kalaallit Nunaanni peqqinnissaqarfimmi salliutinneqarnissaat politikerinit oqalliseqataaffigineqarusuppa?
  • Dronning Ingridip Napparsimmavissuata uninngavissat sipporujussuarlugit uninngasoqartarnera politikeritut qanoq isumaqarfigaasiuk?
  • Politikeritut inissanik sippuilluni uninngasoqartarnera annikillisinniarlugu, peqqinnissaqarfillu tamakkerlugu peqqissaasut sulinerminni atugarisaat pitsanngorsaaviginiarlugit, qanoq iliuuseqarniarpisi?
  • Naalakkersuisunngorumaartussat suliniutissatut akuerisaareersunik- soorlu innuttaasut peqqissuunissaat pillugu suliniut Inuuneritta II, TB akiorniarlugu suliniut allallu ingerlatitseqqinniarpaat?
  • Kommuneqarfik Sermersuumi immikkut napparsimmaveqalernissamik eqqarsaat qanoq isumaqarfigaasiuk?
  • Ilinniarneq naammassippat minnerpaamik ass. ukiuni marlunni Kalaallit Nunaanni peqqinnissaqarfimmi sulinissamik piumasaqaateqarsinnaaneq qanoq isumaqarfigaasiuk?

 

 

Ilinniagallit kattuffiattut politikkikkut sunniuteqarniarsarisariaqarpugut, taamaammat novembarip ulluisa 23-anni 2014 qinersisartunik ataatsimiititsinermut peqataassaagut politikerinullu toqqaannartumik apeqquteqarluta.

 

Qinersilluarisi- kikkut tamat oqartussaaqataanerat tunngavigalugu pisinnaatitaaffissi atorluarsiuk.

 

Inuuti Fleischer

Siulittaasoq